अरुलाई जोगाउन खोज्दा आफ्नै डुंगा डुब्ला

ललिता निवास र सुन काण्डले अहिले नेपाली राजनीतिलाई तातो बनाएको छ । यी काण्ड सतहमा आएपछि नेपाल भ्रष्टाचारीको अखडा भएको आरोप लाग्न थालेको छ । राष्ट्रिय तथा अन्तर्राष्ट्रिय क्षेत्रमा नेपालको बदनाम हुने क्रम बढ्दो अवस्थामा रहेको छ । अहिले यी दुई काण्डलाई लिएर नेपालको राजनीति दुई ध्रुवमा बाँडिएको छ । सत्तारुढ दल यी काण्डमा मुछिएका नेता जोगाउने खेलमा लागेको छ भने प्रमुख प्रतिपक्षीलगायतका विपक्षी दलहरु भने उच्चस्तरीय छानबिन समिति बनाउनुपर्ने माग राख्दै संसद् अवरुद्ध गरिरहेका छन् । सुशासनको नारा दिने यो सरकार ललिता निवास जग्गा प्रकरणमा आफ्ना सहयात्री पूर्वप्रधानमन्त्रीद्वय माधवकुमार नेपाल र बाबुराम भट्टराईलाई जोगाउने खेलमा लागेको देखिन्छ । प्रधानमन्त्री पुष्पकमल दाहाल प्रचण्ड सत्ता टिकाउने नाममा पूर्वप्रधानमन्त्रीद्वय नेपाल र भट्टराई जोगाउने घृणित खेलमा लाग्नुले वर्तमान सरकारको सुशासनको नारा नारामा नै सीमित हुन पुगेको छ ।

संसद्लाई बन्धक बनाएर भए पनि नेपाल र भट्टराईलाई जोगाउने खेलमा प्रचण्ड सरिक रहनुले पनि यो सरकार कस्तो विधिको शासन स्थापना गर्न खोज्दै छ भन्ने छर्लङ्ग हुन्छ । दलीय राजनीतिमा जनताको वितृष्णालाई मलजल गर्ने काम सरकारबाट भइरहेको देखिन्छ । सरकारी संरक्षणविना यी दुई ठूला काण्ड हुन नसक्ने भन्दै नेकपा एमालेले प्रधानमन्त्रीको राजीनामा माग गरिरहेको छ भने वर्तमान राज्य सत्ता छानबिन समिति गठन नै नगरी पेलेर जाने मनस्थितिमा रहेको छ । यसकारण यो सरकारले दुवै काण्डको कर्मकाण्डी छानबिन गरेर जनताको आँखामा छारो हाल्ने काम गर्न खोजेको भान हुन थालेको छ ।