नवलपुर खण्डमा बन्दैछ जेब्रा क्रस

बुटवल–नारायणगढ सडकखण्डअन्तर्गत नवलपुर खण्डमा जेब्रा क्रस निर्माणको काम भइरहेको छ । सडक सुरक्षा सुदृढ बनाउने तथा पैदलयात्रीलाई सुरक्षित रूपमा सडक वारपार गर्न सहज वातावरण सिर्जना गर्ने उद्देश्यले जेब्रा क्रस निर्माणको काम अघि बढाइएको हो ।

शनिबार कावासोती नगरपालिकाको विभिन्न चोक तथा बाटो क्रस गर्न बनाइएका स्थानहरूमा जेब्रा क्रस निर्माण गर्ने कार्य गरिएको छ । सडक निर्माण कार्य अन्तिम चरणमा पुगेको हुँदा आयोजनाले सडक सुरक्षासम्बन्धी विभिन्न संकेत चिन्ह राख्ने कामलाई पनि धमाधम अगाडि बढाएको छ ।

आयोजनाका पूर्वी खण्डका सूचना अधिकारी शिव खनालका अनुसार गैँडाकोट, देवचुली र कावासोतीका विभिन्न क्रसिङ क्षेत्रहरूमा हाल जेब्रा क्रस निर्माण गर्ने काम भइरहेको छ । लामो दूरीसम्म क्रसिङ गर्ने स्थान नभएको जंगल क्षेत्रहरूमा समेत जेब्रा क्रस निर्माण गरिने उहाँले बताउनुभयो ।

सडक विस्तार तथा स्तरोन्नतिसँगै पैदलयात्रीको सुरक्षालाई प्राथमिकतामा राख्दै व्यस्त बजार क्षेत्र, शैक्षिक संस्था, अस्पताल तथा सार्वजनिकस्थल नजिक जेब्रा क्रस निर्माण गर्न थालिएको सूचना अधिकारी खनालले बताउनुभयो । जेब्रा क्रस निर्माण भएपछि पैदलयात्रीले तोकिएको स्थानबाट सुरक्षित रूपमा सडक पार गर्न सक्नेछन् ।

बुटवल–नारायणगढ सडकखण्ड निर्माण सम्पन्न भएसँगै आवश्यक संकेत चिन्हको अभाव हुँदा दुर्घटनाको जोखिम बढेको थियो । तीव्र गतिका सवारीसाधनका कारण सडक पार गर्न कठिन हुनेगरेको अवस्थामा जेब्रा क्रस निर्माण भएपछि दुर्घटना न्यूनीकरणमा सहयोग पुग्ने स्थानीयवासीको भनाइ छ ।