थकाली समुदायले गुमायो अगुवा महिला नेतृ

पोखरा । गण्डकी प्रदेशसभा सदस्य विमला गौचनको हृदयाघातका कारण निधन भएको छ । डेंगु उपचारका क्रममा रहेकी सांसद गौचनको बिहीबार राति साढे १२ बजे काठमाडौंको ग्रान्डी अस्पतालमा निधन भएको हो ।

२०७९ सालको प्रदेशसभा निर्वाचनमा नेपाली कांग्रेस म्याग्दीबाट समानुपातिक सांसद निर्वाचित गौचन ६३ वर्षकी थिइन् । स्वास्थ्यमा समस्या देखिएपछि उनलाई पोखरादेखि उपचारका लागि ग्रान्डी अस्पतालमा लगिएको थियो । पाँच दिनअघि डेंगु पुष्टि भएको भए पनि उनी बुधबार साँझसम्म सामान्य हिँडडुल गर्ने तथा आफैंले खाना खान सक्ने थिइन् । तर, राति एक्कासि अक्सिजन एवं रक्तचापसमेत घटेको र साढे १२ बजे हृदयाघात भएको चिकित्सकको भनाइ उद्धृत गर्दै गण्डकी प्रदेश सांसद प्रकाश बरालले जानकारी दिए ।