मधेस सरकारलाई जनमत सचिवको प्रस्ताव- एसईईपछि सैन्य तालिम अनिवार्य गरिनुपर्ने

काठमाडौं : मधेस प्रदेश सरकारले आर्थिक वर्ष २०८२/०८३ को नीति तथा कार्यक्रम तथा बजेट निर्माणको तयारी गरिरहेका बेला जनमत पार्टीका केन्द्रीय सचिव बीपी साहले युवामा अनुशासन, आत्मरक्षा र राष्ट्रिय चेतना विकास गर्न माध्यमिक शिक्षा परीक्षा (एसईई) पछि ६ महिनाको अनिवार्य सैन्य तालिम सञ्चालन गर्न आग्रह गरेका छन्।

साहले यस प्रस्तावलाई मधेसको दीर्घकालीन समृद्धि र आत्मनिर्भर प्रदेश निर्माणका लागि रणनीतिक लगानीको रूपमा चित्रण गरेका छन्। 'अनिवार्य सैन्य तालिमले युवालाई राष्ट्रको जिम्मेवार नागरिक बनाउनेमात्र होइन, सामाजिक एकता र शारीरिक-मानसिक सुदृढीकरणमा समेत योगदान पुर्‍याउँछ,' मधेसका मुख्यमन्त्री सतिश कुमार सिंहलाई बुझाइएको ज्ञापन पत्रमा भनिएको छ।