देश दौडाहामा शीर्ष नेता

काठमाडौं । आसन्न प्रतिनिधि तथा प्रदेशसभा निर्वाचनका लागि मुख्य राजनीतिक दलका शीर्ष नेतृत्व चुनावी प्रचारप्रसारमा देश दौडाहामा छन् । सबैजसो मुख्य राजनीतिक दलले चुनावी सभालाई शक्ति प्रदर्शनको माध्यम बनाएका छन् ।

प्रधानमन्त्री एवं नेपाली कांग्रेसका सभापति शेरबहादुर देउवा गृह प्रदेश सुदूरपश्चिममा चुनावी प्रचारमा व्यस्त रहँदा पूर्वप्रधानमन्त्री एवं नेकपा एमालेका अध्यक्ष केपी शर्मा ओलीले पनि सुदूरपश्चिमबाटै चुनावी सभाको उद्घाटन गरेका हुन् । प्रधानमन्त्री देउवाले १७ देखि २० कात्तिकसम्म गृहजिल्ला डडेल्धुराका विभिन्न ठाउँमा भएका चुनावी आमसभालाई सम्बोधन गरेका थिए ।