दोषीले उन्मुक्ति नपाऊन्

मुलुकको दलीय व्यवस्थालाई नै धज्जी उडाउने गरी सार्वजनिक भएको नक्कली भुटानी शरणार्थी प्रकरणको अनुसन्धान पूरा भएको छ । प्रहरीले उक्त प्रतिवेदन सरकारी वकिलको कार्यालयमा बुझाएको छ भने अनुसन्धान प्रक्रियालाई खुल्ला राख्ने निष्कर्षमा प्रहरी पुगेको छ । पैसाका लागि आफ्नै नागरिकलाई बेच्न तयार विभिन्न दलका नेता, सरकारी कर्मचारी तथा बिचौलिया अहिले प्रहरी हिरासतमा रहेका छन् ।

नक्कली भुटानी शरणार्थी प्रकरण सार्वजनिक भएपछि अहिले विश्व समुदायको ध्यान नेपालमा परेको छ । उक्त प्रकरण सार्वजनिक भएपछि नेपालका राजनीतिक दल, प्रशासनिक नेतृत्व कति अमर्यादित रहेछन् भन्ने कुराको पटाक्षेपसमेत गरेको छ । सरकारले उक्त प्रकरणलाई कोही कसैको दबाबमा नपर्ने बताए पनि अरु–अरु काण्डमा आफ्ना नेता तथा कार्यकर्ता संलग्न रहेकाले आफू पनि परिने डरले सरकार सञ्चालकहरु अहिले डराउन थालेका छन् भने अनुसन्धानलाई पनि प्रभाव पार्न खोजेको भान हुन थालेको छ । हिजो ठूला–ठूला कुरा गर्नेहरु आज यस विषयमा चुप रहनुले पनि उनीहरुको नियतमाथि प्रश्नचिह्न खडा भएको छ ।