युक्रेनसँग रुसका 'पूरा गर्नै नसकिने' माग, दुई देशबीच तेस्रो चरणको वार्ता हुँदै

मस्को । रुसी फौजले सोमबार आफूले युद्ध विराम गर्ने र मानवीय उद्धार मार्गहरू खोलिदिने बताउँदै युक्रेनका सहरहरूका आवासीय क्षेत्रहरूमा व्यापक बमबारी र रकेट प्रहार कार्यलाई निरन्तरता दिइरहेको छ । रुस र युक्रेनबीचको पहिलो र दोस्रो शान्तिवार्ता विना निष्कर्ष टुङ्गिएका कारण सोमबार नै तेस्रो चरणको वार्ता सुरु गर्ने योजना बनाइएको छ ।

क्रेमलिनका प्रवक्ता दिमित्री पेस्कोभले रुसले युक्रेन समक्ष आफ्नो सैनिक गतिविधि रोक्ने, तटस्थ मुलुक बनेर नेटो र ईयूमा प्रवेश गर्ने स्थिति रोक्न संविधान नै परिवर्तन गर्ने, क्रिमियालई रुसी भू–भागको मान्यता दिने र पृथकतावादी क्षेत्र दोनेत्स्क र लुहान्स्कको स्वाधिनतालाई मान्यता दिनेजस्ता मागहरू अघि सारेको जानकारी दिएका छन् । जुन मागहरू युक्रेनले सहजै मान्ने देखिँदैन ।