जापानमा संयुक्त अभिभावकत्व कानून लागू, समर्थन र चिन्ता सँगै

सम्बन्धविच्छेदपछि बालबालिकाको अभिभावकत्व व्यवस्थामा ठूलो परिवर्तन गर्दै जापानले अब आमाबाबुलाई संयुक्त रूपमा अभिभावकत्व ग्रहण गर्ने अधिकार दिएको छ । दशकौँदेखि एकल अभिभावकलाई मात्र अधिकार दिने प्रणाली अन्त्य गर्दै लागू गरिएको नयाँ कानूनले सामाजिक परिवर्तनको सङ्केत दिएको छ, तर यससँगै घरेलु हिंसाबाट प्रभावितहरूको सुरक्षाबारे गम्भीर बहस पनि सुरु भएको छ ।

यसअघि जापानमा सम्बन्धविच्छेदपछि प्रायः आमालाई मात्र अभिभावकीय अधिकार दिइन्थ्यो, जसले विकसित देशहरूमध्ये जापानलाई अपवाद बनाएको थियो । नयाँ व्यवस्थाले भने आमाबाबुलाई अभिभावकत्वबारे आपसी सहमतिमा निर्णय गर्न अनुमति दिएको छ । यदि दुवै पक्ष सहमत भए एकल अभिभावकत्व पनि कायम राख्न सकिनेछ, तर असहमति भएमा पारिवारिक अदालतले हस्तक्षेप गरी निर्णय गर्नेछ । घरेलु हिंसाका स्पष्ट घटनामा भने एकल अभिभावकत्वलाई प्राथमिकता दिइने व्यवस्था गरिएको छ ।