बीआरआई कार्यान्वयन सम्झौताको निरर्थक हल्ला

मार्ग महिनाको मध्यतिर प्रधानमन्त्री केपी शर्मा ओली मित्रराष्ट्र चीन भ्रमणमा जाँदै हुनुहुन्छ । उहाँको यस भ्रमणसँगै एकपटक पुनः चीनद्वारा प्रस्तावित महत्वाकांक्षी बीआरआई परियोजना कार्यान्वयनको चर्चा सुरु भएको छ । बीआरआई छातामा सम्मिलित हुने सहमति त नेपालले जनाइसकेकै हो । अब कार्यान्वयनकै पालो हो । तर, प्रधानमन्त्री ओलीको चीन भ्रमणको चर्चासँगै परियोजना कार्यान्वयनको चर्चा चुलिनु आफंैमा अनौठो छ ।

कुनै पनि परियोजना कार्यान्वयनमा जानुपूर्व परियोजनाको ठोस पहिचान त हुनैपर्छ होला । बीआरआईअन्तर्गत काठमाडौं र बेइजिङ जोड्ने बुलेट ट्रेन निर्माण हुने हो वा दाङ उपत्यकामा विश्वकै सबैभन्दा ठूलो विमानस्थल निर्माण हुने हो अथवा पोखरामा डिस्नेल्यान्डभन्दा ठूलो एम्युजमेन्ट पार्क बन्ने हो, त्यसको निक्र्यौल त हुनुपर्छ होला । यो द्विपक्षीय सम्झौता हो र त्यसैकारण जे जस्तो निर्माण गर्ने हो, त्यसमा दुवै पक्षको सहमतिको पनि आवश्यकता पर्ला । नेपालले प्रस्ताव गर्दैमा वा चीनले प्रस्ताव गर्दैमा मात्र त पक्कै पुग्दैन होला ।