श्रमका लागि विद्यार्थी भिसामा रुस पुगेका १५० युवा अलपत्र

काठमाडौँ — श्रमको खोजीमा विद्यार्थीका रूपमा रुस पुगेका १५० नेपाली युवा मस्कोमा बिचल्लीमा परेका छन् । उनीहरूसँग पढ्न विश्वविद्यालय छैन, काम गर्न रोजगारदाता छैन र रुसमा बस्न भिसा छैन । विश्वविद्यालयमा पढ्ने र रोजगारीबाट पैसा कमाउने भनेर गएका उनीहरू काममा जोतिँदा कक्षा लिन सकेनन्, त्यसैले उनीहरूको भिसा पनि नवीकरण नभएकाले अब न पढाइ न रोजगारीको अवस्थामा पुगेका छन् ।

१० लाख रुपैयाँसम्म लगानी गरेर रुस पुगेका ती विद्यार्थी भिसा थप्न दलालको सहारा लिँदा झनै ठगिएका छन् । ती विद्यार्थीबाट भिसा नवीकरण गर्ने भन्दै करिब ३ करोड ५० लाख रुपैयाँ उठाएर दलाल फरार छन् ।