आन्दोलन र संघर्षमै आम जनता पार्टीको जोड, बेथितिमाथि निरन्तर प्रहारको रणनीति

काठमाडौँ । आम जनता पार्टी (आजपा)ले आन्दोलन र संघर्षमा जोड दिँदै आगामी राजनीतिक गतिविधिलाई अघि बढाउने रणनीति अख्तियार गरेको छ । २०७९ को संघीय निर्वाचनपछि पार्टी गठन गरेर राजनीतिक गतिविधि गर्दै आएका अध्यक्ष प्रभु साहले मंगलबारदेखि राजधानीमा जारी केन्द्रीय समिति बैठकमा आगामी दिनमा तेस्रो जनआन्दोलन गर्ने उद्घोष सहित आफ्नो राजनीतिक प्रतिवेदन पेस गरेका छन् ।

‘दलाल दलतन्त्रको भण्डाफोर गरौँ, जनआन्दोलनको दिशामा अघि बढौँ’ भन्ने उद्घोषका साथ अध्यक्ष साहले बैठकमा पेस गरेको राजनीतिक प्रतिवेदनमा प्रमुख राजनीतिक दलहरूको भ्रष्ट चरित्रले सिङ्गै देश सङ्कटग्रस्त र असफल बन्दै गएको निष्कर्ष निकालिएको छ । जसका कारण आम जनताको शासन व्यवस्था स्थापनाको लागि तेस्रो जनआन्दोलनको विकल्प नभएको साहको तर्क छ ।