ओलीको नगरमा झापाली साथीले झण्डै डुबाए, गफ भोलिपल्ट ‘भेरिफाइ’ गर्न निस्कँदा..

पत्रकारहरुलाई फ्याक्ट चेकको बारेमा एउटा क्लास लिइदिनुपर्‍यो भनी झापाबाट निम्तो आएको धेरै समय भइसकेको थियो। यो हप्ता बल्ल समय मिलाइयो।

कार्यक्रम सकिएपछि भोलिपल्ट बल्ल फर्कने योजना थियो। त्यो रात आयोजक साथीहरुसँगै इलाममा बस्न जाने कि लामो समय भेट नभएका अर्कै साथीसँग दमकमा बस्ने- दुई विकल्प थियो। इलामको कन्याम अस्ति भर्खरै पनि गइसकेको हुनाले दमकै बस्ने एकल निर्णयमा लालमोहर लगाइयो। दमक- पूर्व प्रधानमन्त्री केपी ओलीको निर्वाचन क्षेत्र। अहिलेसम्म नघुमेको ठाउँ। साथी पनि फेरि सस्पेन्स, थ्रिलर कथा वा फिल्म हेर्नै नपर्ने गरी गफ सुनाउन खप्पिस ! सुन्न पनि रमाइलो ! पहिलो पटक दमक आएको, घुमाउनु पर्छ नि भनेकोले कामधाम पर सारेरै मेरो गाइड बन्न तयार भए साथी।