अनधिकृत रूपमा नेपाल प्रवेश गर्न लागेका बंगलादेशी नागरिक सीमामा पक्राउ

झापा : झापाको काँकडभिट्टा सीमा क्षेत्रबाट एक बंगलादेशी नागरिक पक्राउ परेका छन्। आज दिउँसो १२:४५ बजे मेचीनगर नगरपालिका-६ स्थित गैरीगाउँमा भारत पानीट्यांकीबाट मेची खोलाको बाटो हुँदै नेपालतर्फ अनधिकृत रूपमा प्रवेश गर्दै गरेको अवस्थामा बंगलादेशी नागरिक पक्राउ परेका हुन्।

बंगलादेशको राहदानी बोकेका तुलाटोली कचुआ मनोहरपुर –३६३० चाँदपुर बस्ने ३३ वर्षीय मोहम्मद सैफुल इस्लाम पक्राउ परेको जिल्ला प्रहरी कार्यालय झापाले जनाएको छ। उनलाई इलाका प्रहरी कार्यालय काँकडभिट्टाबाट खटिएको प्रहरी टोलीले नियन्त्रणमा लिएको हो। ती बंगलादेशी नागरिक इस्लामलाई आवश्यक कारबाहीको लागि बसमार्फत अध्यागमन विभाग काठमाडौँ पठाइएको प्रहरीले जनाएको छ।