डुंगामा ठेक्का, चराले ठेगाना फेरे !

कपिलवस्तु । जगदीशपुर तालमा वसन्तसँगै चराले गुँड बनाउने, अण्डा पार्ने, चल्ला हुर्काउने समय हो । तर तालमा चल्न थालेका मोटरबोटका आवाज, छाल र चहलपहलले चराको प्राकृतिक जीवनशैलीमा यस्तो खलल पारेको छ कि उनीहरूले आफ्नै बासस्थान छोड्न थालेका छन् ।

नेपाल पन्छीविद् संघको टोलीले अन्वेषणका क्रममा मोटरबोटले आत्तिएका चराको दृश्य क्यामरामा कैद गरेको छ । चराविज्ञ डा. हेमसागर बराल भन्छन्, ‘यहाँ प्रजनन चक्रमै डिस्टर्ब भएको छ, यस्तो अवस्थामा चरा अण्डा त्याग्न, ओथारो छोड्न वा प्रजनन नै नगर्न बाध्य हुन सक्छन्, दीर्घकालमा यो संकट गम्भीर बन्छ ।’