रूपान्तरणको हाइवे कि विरोधाभासको सुरुङ ?

२०८२ भदौ २३ र २४ मा जेनजी पुस्ताको नेतृत्वमा सडकबाट उर्लिएको जनविद्रोहले नेपाली राजनीतिमा स्थायी बन्दै गएको दलीय गुटतन्त्र र (अ)नीतिगत भ्रष्टाचारको जग खलबलाइदियो । सुशासन र शासकीय रूपान्तरणप्रतिको त्यही तीव्र जनआकांक्षालाई संस्थागत गर्दै गत फागुनको निर्वाचनमा नेपाली जनताले राष्ट्रिय स्वतन्त्र पार्टीका वरिष्ठ नेता बालेन्द्र शाहको नेतृत्वलाई करिब दुई–तिहाइको अभूतपूर्व जनादेश सुम्पियो । यो संघीयता स्थापना भएपछिका प्रधानमन्त्रीहरूले पाएको सबैभन्दा बलियो जनाधार हो ।

जनभावनाको त्यही प्रचण्ड लहरमा सवार भएर प्रधानमन्त्री बालेन्द्र शाहको नेतृत्वमा वर्तमान सरकार गठन भएको हो । सरकार गठन लगतै बसेका मन्त्रिपरिषद्को पहिलो बैठकले सय बुँदे ‘शासकीय सुधार कार्यसूची’ स्वीकृत गरी, सय दिनमा सय काम गर्ने महत्त्वाकाङ्क्षी लक्ष्य सार्वजनिक गरिएको थियो ।