लुम्बिनी प्रदेश सभाको बैठक बस्दै, यस्तो छ कार्यसूची

बुटवल । लुम्बिनी प्रदेश सरकारले आर्थिक वर्ष २०८३–८४ का लागि प्रस्तुत गरेको बजेटमाथि सैद्धान्तिक छलफल गर्न आज (आइतबार) लुम्बिनी प्रदेश सभाको बैठक बस्दै छ। प्रदेश सभा सचिवालयका अनुसार बैठक दिउँसो १ बजेका लागि बोलाइएको छ।

सरकारले प्रस्तुत गरेको राजस्व र व्ययको वार्षिक अनुमान (बजेट) माथि प्रदेश सभा सदस्यहरूले असन्तुष्टि जनाएपछि यसअघि बजेटमाथिको छलफल नियमित रूपमा अघि बढ्न सकेको थिएन। बजेटको वितरण, योजना छनोट तथा स्रोत बाँडफाँटप्रति सत्तारुढ दलकै केही सांसदले असन्तुष्टि जनाएपछि प्रदेश सभाको कार्यसूची प्रभावित बनेको थियो।