समाचार संकलनको क्रममा रातोपाटीकर्मीमाथि दुर्व्यवहार गरेको घटनाप्रति महासंघद्वारा भर्त्सना

जीतपुरसिमरा उपमहानगर वडा नं ७ का वडाध्यक्ष सुनिल गुप्ताले आइतवार निर्वाचन अधिकृतको कार्यालयमा तालाबन्दी गरेको विषयमा समाचार लेखेको भन्दै केही एमाले कार्यकर्ता तथा आन्दोलनकारीले पत्रकारमाथि दुर्व्यवहार गरेको घटनामा पत्रकार महासंघ बाराले घोर भर्त्सना गरेको छ ।

आइतबार जीतपुरसिमरा वडा नं ७ का वडाध्यक्ष गुप्ताले आस्रन निर्वाचनलाई प्रभावित पार्ने उद्देश्यले बारा ४ को निर्वाचन अधिकृतको कार्यालयमा तालाबन्दी गरेका थिए । सो विषयलाई लिएर प्रहरीले वडाध्यक्ष गुप्तालाई करिब १ घन्टा नियन्त्रणमा लिएर अव तालाबन्दी नगर्ने सर्तमा माफी मगाएर छोडेको थियो । सोही विषयलाई लिएर लेखिएको समाचारमा एमालेका केही कार्यकर्ता तथा महिला आन्दोलनकारीले सञ्चारकर्मी शारदा पोखरेललाई समाचार किन लेखेको भन्दै मोबाइल खोसेर समाचार सामग्री हटाउनुका साथै गालीगलौजसहित दुर्व्यवहार गरेका थिए । सोही घटनालाई लिएर पत्रकार महासंघले प्रेस स्वतन्त्रता हनन् भएको भन्दै गम्भीर ध्यानाकर्षण जनाएको छ ।