दसैं, दाम र दशा

सारा नेपाल दसैंको रंगमा रंगिएको छ । जताततै दसैं बजारको चहलपहल निकै बढेको छ । बसपार्क, एयरपोर्ट तथा भारतबाट नेपाल छिर्ने नाकामा देशविदेशबाट दसैं मनाउन घर फर्किने नेपालीको ठुलो भीड छ । दसैंको आगमनले केही समयका लागि भए पनि मानिसका अनेक दुःखपीडा बिर्सादिएको छ । जताततै दसैंको खुसी नै खुसीको माहोल छ ।

दसैंमा बालबालिकाको रमाइलो त झनै चचहै हुने गर्छ । नयाँनयाँ लुगामा शृंगारिएर पिंगमा मच्चिरहेका र चंगा उडाइरहेका बालबालिका यति विघ्न खुसी अन्य बेलामा विरलै देखिन्छन् । केटाकेटीका लागि त दसैं कट्कटिया दाम जम्मा गर्ने अवसर पनि हो भने निम्न तथा मध्यम परिवारका घरमुलीलाई दसैं दामको जोगाडको पिरालो हो ।