बजेट अभावमा दुम्किबास-त्रिवेणी सडक निर्माण रोकिन्न : मुख्यमन्त्री पोखरेल

कावासोती । गण्डकी प्रदेशका मुख्यमन्त्री कृष्णचन्द्र नेपाली पोखरेलले बजेट अभावमा दुम्किबास त्रिवेणी सडक निर्माणको काम नरोकिने बताएका छन् । मुख्यमन्त्री भएको आठ महिनापछि गृह जिल्लाको विनयी त्रिवेणी गाउँपालिका पुगेका गण्डकी प्रदेशका मुख्यमन्त्री पोखरेलले दुम्किबास–त्रिवेणी सडक ट्र्याकको अवलोकन गर्दै बजेटको अभावमा काम नरोकिने बताए ।

शुक्रबार गण्डकी प्रदेश सरकारका अर्थमन्त्री राजजीप्रसाद बराल, मुख्यसचिव रविलाल पन्थ, गण्डकी प्रदेशसभा सदस्यहरु विष्णुप्रसाद लामिछाने, ओमकला गौतमसहित दुम्किबास–त्रिवेणी सडक ट्र्याकको अवलोकन गर्न पुगेका मुख्यमन्त्री पोखरेलले गण्डकी प्रदेश सरकारको गौरवको आयोजनाका रूपमा रहेको त्रिवेणी–कोरोला सडकको मुख्यखण्ड दुम्किबास–त्रिवेणी सडकखण्ड निर्माणको काम चाँडै अगाडि बढ्ने बताए ।