पुनः आवागमन रोकेर धुलिखेल–खावा सडकखण्डको स्तरोन्नति

काभ्रेपलाञ्चोक – अरनिको राजमार्गअन्तर्गत काभ्रेपलाञ्चोकस्थित धुलिखेल–खावा सडकखण्डमा पुनः सवारीसाधन आवागमनमा रोक लगाई स्तरोन्नतीकार्य गरिने भएको छ । यसका लागि डिभिजन सडक कार्यालय भक्तपुरले उक्त सडकखण्डको स्तरोन्नतिकार्यलाई तीव्रता दिइएको अवस्थामा कलोपत्र (पक्की) बनाउन आइतबारदेखि रातको समयमा यही चैत ३० गतेसम्म सडक बन्द गराउन लागेको हो ।

यसअघि चैत ७ देखि २० गतेसम्म रातको समयमा सवारी आवागमन रोकेर स्तरोन्नति गरिएको थियो । दुई हप्ता रातको समयमा २.५ किलोमिटर पक्की बनाउने भनिएकामा समय अपुग भएपछि पुनः १० दिन थपेर रातको समय (साँझ ६ः०० देखि बिहान ५ः०० बजेसम्म) उक्त कार्यलाई निरन्तरता दिइने कार्यालय प्रमुख सिनियर डिभिजनल इन्जिनियर सुमन योगेशले बताए । उनका अनुसार उक्त अवधिभर टिपरलगायतका मालबहाक सवारीसाधनलाई भने पूर्णतः रोक लगाइएको छ ।