सुडानबाट नेपालीको उद्धार गर

अफ्रिकी मुलुक सुडान नेपालबाट ५ हजार ८ सय किलोमिटर टाढा छ। त्यति टाढाको देशसँग नेपाल खासै सरोकार रहेको इतिहास छैन। यसपालि केही दिनयता त्यहाँ भड्किएको हिंसाले नेपाल र नेपालीलाई पनि चिन्तित बनाएको छ। किनभने त्यहाँ केही नेपाली पनि छन्, जसको जिउधन रक्षाको चासो र चिन्ताको विषय भएको छ। देशभित्र वा बाहिर जहाँसुकै पनि नागरिकको सुरक्षाको दायित्व राज्यको हो। राज्यले सबैभन्दा पहिला नागरिकलाई दिलाउने भनेकै सुरक्षा हो र हुनुपर्छ। त्यो कर्तव्य यतिबेला सुडानमा फसिरहेका नेपाली नागरिकका लागि निकै टड्कारो भएको छ। सैनिक र अर्धसैनिक बलका बीचमा भएको युद्धका कारण सुडानी नागरिक पनि असुरक्षित छन्। सयौंको ज्यान दुई/तीन दिनकै बीचमा गइसकेको छ।

सत्ता जनताको चाहनामा चल्ने, लोकतान्त्रिक अभ्यास गर्नेभन्दा पनि तानाशाही पाराले चलाउने हठले त्यहाँ चर्किएको युद्ध उन्मादमा मानवीयता हराएको छ। अन्तर्राष्ट्रिय तटस्थ संस्थाका अधिकारीहरू पनि जोखिममा परेका छन्। तानाशाही अवस्था र सत्ता उन्मादको परिणाम कस्तो हुन्छ भन्ने पाठ सबैका लागि ग्रहणलायक दृष्टान्त त त्यो हुँदै हो। अहिलेलाई चाहिँ नेपाललाई आफ्ना नागरिकलाई कसरी जोगाउने भन्ने प्राथमिक कुरा हो। शान्ति सेनामा खटिएका नेपाली अर्काे मुलुक चाडतिर गएको भन्ने छ। १९ नेपाली इजिप्टको कायरोस्थित नेपाली दूतावासको सम्पर्कमा छन् तर उनीहरूको उद्धार भइसकेको छैन।