‘हैट ! टेकनाथजी कहाँ फसेको ?’

हरेक प्राणीको फरक विशेषता हुन्छ । भनिन्छ, गाई कल्चौँडोेले बाँच्छ । गोरु काँधले बाँच्छ । गधा पिठ्यूँले बाँच्छ तर मानिस बुद्धि र विवेकले बाँच्छ । यो प्राणी विशेषका विशेषताका आधारमा भनिएको हो । आटव्य जंगलमा जब सिकारीहरू आफ्ना सिकारको खोजीमा गोलीगठ्ठा भिरेर चरा मार्न पस्छन् सारा जंगली चराचुरुङ्गीहरू चाप्पचुप्प भएर सासलाई नाकमा ल्याई अड्याएर चुप लागी सिकारीको चाल बुझेर लुकिरहेका हुन्छन् रे ! त्यही बेला तित्रो भन्ने चराचाहिँ जंगल शान्त भएको थाहा पाएर अझ जोडजोडले त्रुतत्रुत गरेर कराउँछ रे ! ऐन मौकामा सिकारीले उसलाई उसैका आवाजका आधारमा रेकी गरी ताकेर गोली प्रहार गर्छ र भुतुक्कै हुने गरी मार्दछ । यसैले भन्ने गरिन्छ कि ‘तित्राको मुखै बैरी !’

यदि तित्राले आफू नकराउँदो हो भने उसलाई सिकारीले अनाहकमा सिकार गर्ने थिएन । यो भयो जंगलको कानुन । अब समाज र पारिवारिक कानुनका बारेमा केही मीमांसा गरौं । यतिखेर नक्कली भुटानी शरणार्थी बनाएर अमेरिका छिराउनेहरूको गिरोहलाई नेपाल प्रहरीले भटाभट पक्राउ गरिरहेको छ । माहौल देख्दा यस्तो लाग्छ कि यो गिरोहमा कुनै पनि मानिसहरू छुटेका छैनन् । पूर्वउपप्रधानमन्त्री तथा नेकपा एमालेका सचिव पोष्टबहादुर रायमाझी, पूर्वगृहमन्त्री बालकृष्ण खाँड, नेपाली कांग्रेसका पूर्वसांसद आङ्टावा सेर्पा, पूर्वगृहमन्त्री रामबहादुर थापा बादलका सुरक्षा सल्लाहकार इन्द्रजीत राई, नाम चलेका ठूलाबडाका छोराहरू, पूर्वगृहसचिव टेकनारायण पाण्डे र अरू घगडान–घगडान नेता र कर्मचारीको निकै लामो सूची रहेको छ भनिँदै छ ।