अर्थतन्त्रको आशा

देशको अर्थतन्त्र संकटतर्फ उन्मुख भएको कुरा बजारमा चर्चा भइरहे तापनि नेपाल राष्ट्र बैंकले शुक्रबार सार्वजनिक गरेको चालू आर्थिक वर्षको मौद्रिक नीतिको तेस्रो त्रैमासिक समीक्षामा भने देशको अर्थतन्त्रका आन्तरिक र बाह्य सूचकहरू सकारात्मक दिशातर्फ उन्मुख भएको संकेत गरिएको छ । सरकारले कम्तीमा सात महिनाको वस्तु तथा सेवा आयात धान्न पर्याप्त हुने गरी विदेशी विनिमय सञ्चिति कायम गर्ने लक्ष्य रहेकोमा चैत मसान्तमा साढे नौ महिनाको वस्तु तथा सेवा आयात धान्न पुग्ने विदेशी मुद्रा सञ्चिति रहेको छ ।

विदेशी विनिमय सञ्चिति १७ दशमलव ९ प्रतिशतले वृद्धि भएको छ । चालू खातामा सुधार भए पनि अझै घाटामा रहेको छ, तथापि शोधनान्तर बचत भएको छ । समीक्षा अवधिसम्म चालू खाता ५१ अर्ब ८२ करोडले घाटामा रहेको छ तर शोधनान्तर स्थिति १ खर्ब ८० अर्ब १७ करोडले बचतमा रहेको छ । गत आर्थिक वर्षको यसै अवधिमा चालू खाता ५ खर्ब १० अर्ब ५८ करोड र शोधनान्तर स्थिति २ खर्ब ६८ अर्ब २६ करोडले घाटामा रहेको थियो ।