रूसमा कहाँ हराए विमल ?

धनुषा : घरको ऋणले च्यापेपछि दुबई हुँदै रुसी सेनामा गएका थिए २९ वर्षीय विमल गजमेर। उनी दुई महिनादेखि सम्पर्कविहीन भएपछि यता परिवार चिन्तामा डुबेको छ। नेपाल फर्किएर दुई दिनअघि मात्रै सम्पर्कमा आएका उनका साथीले आफू बसेको ठाउँ एकदमै खतरायुक्त रहेको बताएपछि घरमा उराठिलोपन छाएको छ।

५४ वर्षीय बुवा तिलकबहादुर विश्वकर्मा दुई दिनदेखि बेचैन छन्। अटो चलाएर जीविकोपार्जन गर्दै आइरहेका उनलाई स्टेरिङमा बस्ने हिम्मत जुटिरहेको छैन। आमा सहुमाया विश्वकर्मा ब्याकुल बनेकी छन्। उनको मन भारी भएको छ। सहुमायाका आँखाबाट कति बेला आँसु झर्छ पत्तै पाउँदिनन्।