मुर्छित छिन् सुजनकी आमा

आइतबार बिहानसम्म पनि उनका लागि छोरा अस्पतालको आईसीयूमा उपचाररत नै थिए। कारण, घरपरिवार र आफन्तले छोराको निधन भएको खबर आमालाई भनेनन्। ललितपुरको बालकुमारीमा प्रहरीको निर्घात कुटपिटबाट महाबु गाउँपालिका–६ का सुजन रावतको गत शुक्रबार नै ज्यान गइसकेको थियो। तर, आमा नन्दा रावत कटुवाललाई छोरालाई आईसीयूमा राखेर उपचार भइरहेको भनिएको थियो।

आफन्त, छरछिमेकी, साथीभाइले आइतबार बिहानसम्म पनि छोराको उपचार भइरहेको छ भनेर सान्तवना दिइरहे। घरमा पुग्नेजत्तिले छोराको उपचार भइरहेको भनेपछि उनको मनमा छोरा बाँच्ने आशाको दियो निभेकै थिएन्। छोरा बाँच्ने आस बाँकी नै थियो। उनी घरमा कोही नयाँ मान्छे आउनेबित्तिकै सोध्ने गर्थिन् ‘मेरो बाबु (छोरा) आईसीयूमा छ र ? ढाटेका हौं कि साँचो हो भनिदेऊ न।’