‘बीआरआईमा आधारित परियोजना अघि बढाउन नेपाल प्रतिबद्ध छ’

काठमाडौं । हालैमात्र चीन भ्रमण गरेर फर्केका प्रधानमन्त्री पुष्पकमल दाहाल ‘प्रचण्ड’ले चीनको महत्वाकांक्षी योजना बेल्ट एन्ड रोड इनिसिएटिभ (बीआरआई) मा आधारित परियोजना अघि बढाउने प्रतिवद्धता व्यक्त गर्नुभएको छ ।

बीआरआई शुरू भएको १० वर्ष पुगेको अवसरमा आइतबार नेपाल–चीन मैत्री मञ्चले राजधानीमा आयोजना गरेको ‘बीआरआईको एक दशक : व्यापार, लगानी र सम्पर्क सञ्जाल’ विषयक गोष्ठीको उद्घाटन गर्दै प्रधानमन्त्री प्रचण्डले यस्तो प्रतिबद्धता व्यक्त गर्नुभएको हो । उहाँले भन्नुभयो– ‘बीआरआईमा आधारित परियोजना अघि बढाउन नेपाल प्रतिबद्ध छ । बीआरआईअन्तर्गत परियोजना छनोट र कार्यान्वयन हुनेगरी विकास निर्माणका परियोजना अगाडि बढाउने नेपाल सरकारको स्पष्ट धारणा हो ।’ उहाँले यसका लागि कोभिड महामारी, हाम्रो प्रणाली र संरचनागत सीमाहरूका कारण बीआरआई परियोजना अघि बढाउन केही ढिलाइ भएको जिकिर गर्दै भन्नुभयो– ‘नेपाल बीआरआई परियोजना कार्यान्वयनमार्फत् विकास र समृद्धिलाई तीव्र गतिमा अगाडि बढाउन चाहन्छ । यस्ता परियोजनाको वित्तीय लगानीको मोडेलका बारेमा पनि हामी अझै मिहिन ढंगले छलफल गर्नेछौं । मैले चीन भ्रमणमा पनि चिनियाँ नेता, प्राज्ञिक समुदाय र व्यावसायिक समुदायलाई स्पष्टसँग भनेको छु, नेपालको तर्फबाट लिनुपर्ने पहलकदमी तथा नीतिगत र प्रक्रियागत गतिरोध हटाउन नेपाल सरकारले आवश्यक काम गर्नेछ । चिनियाँ पक्षले पनि लगानीसम्बन्धी आफ्नो नीतिमा पुनर्विचार गर्दै कतिपय परियोजनाको सन्दर्भमा नेपालका लागि अनुदान र सहायताको नीति लिनुपर्छ । दुवै पक्षको जित हुनेगरी हामीबीच सम्बन्ध विस्तार गरी दुवै मुलुकको हितको प्रवद्र्धन गर्न सकिने ठूलो सम्भावना छ । त्यो सम्भावनालाई पूराका पूरा अवसरमा बदलौं ।’