मलिना जोशीको प्रश्न– ‘बालेन र सुदन चाहिँ विश्वव्यापी युवा अनि मेरो उमेरले डाँडा काटिसक्यो ?’

काठमाडौं– मिस नेपाल २०११ मलिना जोशी सोसल मिडियामा निकै सक्रिय रहन्छिन् । उनी आफ्ना गतिविधिहरु सोसल मिडियामार्फत नै फ्यानहरुसँग शेयर गरिरहेकी हुन्छिन् ।

यहि क्रममा उनले अहिलेका दुई चर्चित व्यक्तित्व अथवा अहिलेको सरकारमा महत्वपूर्ण पद सम्हालेका प्रधानमन्त्री वालेन्द्र शाह तथा गृहमन्त्री सुदन गुरुङलाई जोड्दै आफूमाथि उठ्ने प्रश्नको जवाफ दिएकी छिन् ।

मिस नेपाल जोशीले एउटा स्टाटस लेख्दै एकातिर वालेन्द्र शाह तथा सुदन गुरुङलाई विश्वव्यापी युवा भनेर सम्बोधन गर्ने अर्कोतिर मेरो उमेरले डाँडा काटिसक्यो किन भनिएको होला ? भन्ने आशयसहितको जिज्ञासा राखेकी छिन् ।

अभिनेत्रीसमेत रहेकी मिस नेपाल जोशीले आफ्नो र बालेन–सुदनको उमेर उस्तै–उस्तै भए पनि आफ्नो उमेरलाई ‘डाँडा काटिसक्यो’ भन्नुको अर्थ थाहा पाउन खोजेको उनको स्टटाटसबाट बुझ्न सकिन्छ ।

यसका साथै ‘उमेरले डाँडा काटिसक्यो’ भन्दै छिट्टो विवाह गर्न दवाव दिनेलाई अभिनेत्री जोशीको जवाफ छ– ‘मैले बिहे गरेर देश बन्छ भने गर्दिन्छु, तर कसैलाई कतै खासै फरक पर्छ जस्तो लाग्दैन ।’

यसका साथै उनले नवनियुक्त जनप्रतिनिधिहरुलाई शुभकामना दिँदै नेपाली सबै निकै आशावादी भएको कुरा पनि उल्लेख गरेकी छिन् ।