यार्साको खोजीमा हिउँमुनि दबिएका सपना

बझाङ । गतवर्षको वैशाख दोस्रो सातातिर सुर्मा गाउँपालिका–५ का ४२ वर्षीय कलक बोहरा लेकबाट घर फर्किरहेका थिए । पिठ्युँमा भारी थिएन, तर जिम्मेवारीको बोझ असाध्यै ठूलो थियो ।

वर्षभरिको अन्न जोहो गर्ने सपना, छोराछोरीको पढाइ खर्च जुटाउने चिन्ता, घरको ऋण तिर्ने योजना र परिवारलाई नयाँ लुगा किनिदिने आशा बोकेर उनी यार्सा संकलन गर्न हिमालतिर उक्लिएका थिए । तर फर्किने क्रममा तितापानी पुग्दा नपुग्दै उनको शरीरले चिसो थेग्न सकेन । हिमाली सिरेटोले उनको सास रोकिदियो । उनी बाटोमै ढले । त्यसपछि कहिल्यै उठेनन् । उनका सबै सपना त्यही हिउँसँगै विलय भयो ।