साइबर सुरक्षा घटना पछि होइन, पहिले नै नियन्त्रण गर्ने क्षमता विकास गर्नुपर्छ : निर्देशक महर्जन

काठमाडौं । नेपालमा बढ्दो साइबर जोखिम र डिजिटल प्रणालीमाथि हुने आक्रमणको चुनौतीलाई मध्यनजर गर्दै राष्ट्रिय साइबर सुरक्षा केन्द्र, प्रधानमन्त्री तथा मन्त्रिपरिषद् कार्यालयको आयोजनामा “राष्ट्रिय साइबर ड्रिल २०८३” सञ्चालन भइरहेको छ । यो तीन दिने राष्ट्रिय स्तरको साइबर अभ्यास हो, जसको मुख्य उद्देश्य साइबर घटनाहरूको प्रभावकारी प्रतिक्रिया (Incident Response), प्रणाली पुनःस्थापना (System Recovery) तथा अन्तरनिकाय समन्वयलाई सुदृढ बनाउनु हो ।

राष्ट्रिय साइबर सुरक्षा केन्द्रका निर्देशक राजकुमार महर्जनका अनुसार यो अभ्यास विपद् व्यवस्थापनमा गरिने पूर्वतयारी अभ्यास जस्तै हो, जसले वास्तविक साइबर आक्रमणको अवस्थामा सरकारी निकायहरूले कसरी प्रतिक्रिया दिने, समस्या नियन्त्रण गर्ने र प्रणालीलाई पुनः सामान्य अवस्थामा ल्याउने भन्ने विषयमा केन्द्रित छ ।