दस हजार शान्ति सैनिक पठाउने प्रतिबद्धता

काठमाडौँ, असार १३ गते । उपप्रधानमन्त्री एवं रक्षामन्त्री पूर्णबहादुर खड्काले अन्तर्राष्ट्रिय शान्ति स्थापना कार्यका लागि नेपाल संयुक्त राष्ट्रसङ्घको आह्वानमा १० हजारसम्म शान्ति सैनिक पठाउन प्रतिबद्ध रहेको बताउनुभएको छ । नेपाल भ्रमणमा रहनुभएका संयुक्त राष्ट्रसङ्घका शान्ति कार्य (पिस अपरेसन) सम्बन्धी उपमहासचिव जिन पियरे लाक्रोइससँग मङ्गलबार रक्षा मन्त्रालयमा भएको शिष्टाचार भेटवार्तामा उपप्रधानमन्त्री खड्काले सो प्रतिबद्धता व्यक्त गर्नुभएको हो ।

सो अवसरमा उहाँले नेपाल शान्ति सैनिक पठाउने दोस्रो ठुलो राष्ट्र भएकोमा प्रशन्‍नता व्यक्त गर्दै नेपाल सरकारले करिब दुई हजार फौजको सात वटा युनिटलाई संयुक्त राष्ट्रसङ्घबाट माग भएको छोटो अवधिमै खटाउने गरी तयारी अवस्थामा राखिएको जानकारी गराउनुभएको रक्षा मन्त्रालयले जनाएको छ ।