बागमती प्रदेश : एक हजार २३५ कर्मचारी दरबन्दी रिक्त, एक हजार ५०० अस्थायी दरबन्दी स्वीकृत

मकवानपुर । बागमती प्रदेश सरकार मातहतका विभिन्न निकायका एक हजार २३५ वटा दरबन्दी रिक्त अवस्थामा छन् । प्रदेश सरकार मातहत रहेका १२ वटा मन्त्रालय, संवैधानिक आयोग तथा बोर्ड र कार्यालयहरुमा सचिव, अधिकृत तथा सहायकस्तरका गरी कुल ४ हजार २६५ दरबन्दी रहेको मुख्यमन्त्री तथा मन्त्रिपरिषद कार्यालयका सचिव निश्चलराज पाण्डेले बताए ।

प्रदेश सरकार स्थापनाका बखत कायम भएका ७ मन्त्रालय र सो मातहतका निकाय तथा कार्यालयहरुका लागि ३ हजार ७६३ दरबन्दी स्वीकृत भएको थियो । प्रदेश सरकारले पछि केही संरचना थप गरेको उनको भनाइ छ । थपिएका संरचनाहरुमा ५०२ वटा दरबन्दी कायम हुँदा प्रदेश सरकारले प्राप्त गरेको ३ हजार ७६३ दरबन्दी संख्या बढेर ४ हजार २६५ कायम भएको उनले बताए ।