तनहुँ, गोरखा र मुग्लिन क्षेत्रमा विद्युत आपूर्ति अवरुद्ध

काठमाडौँ । तनहुँको आँबुखैरेनी गाउँपालिका–२ मार्किचोकमा अवस्थित २२०/१३२/३३ केभी सबस्टेसनमा प्राविधिक समस्या उत्पन्न हुँदा विद्युत आपूर्ति अवरुद्ध भएको छ। सबस्टेसनमा रहेको १३२/३३ केभी क्षमताको १२ एमभीए पावर ट्रान्सफर्मरमा समस्या आएको हो।

नेपाल विद्युत प्राधिकरण तनहुँ वितरण केन्द्रका अनुसार ट्रान्सफर्मरको अर्थिङ प्रणालीमा खराबी आई अत्यधिक करेन्ट प्रवाह भएपछि हिजो (बुधबार) साँझ ५:३२ बजेदेखि प्रसारण लाइन अवरुद्ध भएको हो। यस सबस्टेसनबाट तनहुँको आँबुखैरेनी, गोरखा जिल्ला तथा मुग्लिन हुँदै चितवनका केही क्षेत्रमा विद्युत आपूर्ति हुँदै आएको थियो, जसका कारण अहिले यी क्षेत्रका ग्राहकहरू प्रभावित भएका छन्।