मालगुडीका दिनहरू

जन्मिएँ म धनकुटाको डाँडागाउँ नामको पाखोमा, धरानको एउटा विपन्न टोलमा हुर्कें, बढें, पढें, किशोरावस्था पार गरें र जीवनको पहिलो एक कोरी वर्ष बिताएँ।

आमाको एकोहोरो ढिपीले गर्दा आखिर हाम्रो आफ्नै छानो ठडियो, खहरे खोलाको डिलदेखि शुरू भएको ६ वटा घरका लस्करको पुच्छारमा। वास्तवमा त्यो छानो मात्रै थियो, पूरा घर बनिनसकेको। तीन लहरमा तीन–तीन वटा गरी भुइँमा दुई–अढाई हात गाडिएका १२–१४ फिट उचाइका जम्मा नौ वटा सखुवाका खाँबामाथि काठकै डाँडाभाटा हालेर त्यसमाथि मट्टीतेलका टिनका पाता ठोकिएको छाना थियो। बेरबार, पर्खाल, गारो, भित्तो केही थिएन– चारैतिर ह्वाङह्वाङ्ती। काठका नौ वटा थामले थामेको त्यसलाई नौखुट्टे पाटी भन्दा पनि हुन्थ्यो।