श्रोत जुटाउन र खर्च गर्न अर्थमन्त्री असक्षम : २ खर्ब २१ अर्ब बजेट घटाइयो

काठमाडौँ — राष्ट्रिय योजना आयोगले दिएको सिलिङ नाघेर विवादास्पद कार्यक्रमका साथ ठूलो अकारको बजेट ल्याएका अर्थमन्त्री प्रकाशशरण महतले स्रोत जुटाउने र खर्च गर्ने अंकमा संशोधन गरेका छन् । महतले गत जेठ १५ गते संसद्मा पेश गरे अनुसारको लक्ष्य भेट्न मुस्किल परेपछि सवा २ खर्ब रुपैयाँले बजेटको आकार नै घटाएका छन् ।

अर्थमन्त्री महतले खर्च गर्न र स्रोत जुटाउन नसकेपछि विनियोजित बजेटमा २ खर्ब २१ अर्ब रुपैयाँ घटाएका हुन् । चालु आर्थिक वर्षका लागि मन्त्री महतले १७ खर्ब ५१ अर्ब ३१ करोड २१ लाख रुपैयाँको बजेट विनियोजन गरेकोमा अर्धवार्षिक समिक्षामार्फत् १५ खर्ब ३० अर्ब २६ करोड ६२ लाख रुपैयाँमा झारिएको छ ।