दूरसञ्चार प्राधिकरणको नेतृत्वका लागि ३२ आकांक्षी, कसको सम्भावना बलियो ?

नेपाल दूरसञ्चार प्राधिकरणको अध्यक्ष पदका लागि ३२ जनाले आवेदन दिएका छन्। सञ्चार तथा सूचना प्रविधि मन्त्रालयले वैशाख २६ गते १० दिनको समयसीमा तोकेर प्राधिकरण र सुरक्षण मुद्रण केन्द्रका कार्यकारी प्रमुख पदका लागि आवेदन आह्वान गरेको थियो। साथै, मन्त्रालयले प्राधिकरणको अध्यक्षसहित चार सदस्य पदका लागि मंगलबारसम्म आवेदन दिन सकिने व्यवस्था गरेको थियो।

मन्त्रालयका सूचना अधिकारी रवीन्द्रप्रसाद पौडेलका अनुसार अध्यक्ष पदका लागि ३२ जना तथा चार सदस्य पदका लागि ३३ जनाको आवेदन परेको छ। अध्यक्ष पदका प्रतिस्पर्धीमा प्राधिकरणकै वर्तमान कर्मचारीदेखि नेपाल टेलिकमका पूर्वप्रबन्ध कर्मचारीसम्म रहेका छन्। केही उम्मेदवारले अध्यक्ष र सदस्य दुवै पदमा आवेदन दिएको समेत खुल्न आएको छ।