सानु भण्डारी : त्यो डायरी मेरो होइन भने तर, न्यायाधीशले विश्वास गरेनन्

काठमाडौँ । ललितपुर महानगरपालिका–२३ मा बस्ने सानु भण्डारी शरणार्थी प्रकरणका मुख्य योजनाकार मध्येका हुन् । आफ्नो घर नजिकै बस्ने पूर्व उपप्रधानमन्त्री टोपबहादुर रायमाझीलाई उनले ‘मामा’ सम्बोधन गर्छन् ।

सानु भण्डारीले अहिले ललितपुरको महालक्ष्मी नगरपालिका– ४ स्थित सितापाखा हाइटमा घर बनाएका छन् । सो घरबाट प्रहरीले बरामद गरेको ‘हरियो डायरी’का कारण मामा–भाञ्जालाई नै अदालतले थुनामा पठाएको छ । सानुको घरबाट बरामद ‘२०१६–नबिल बैंक’ लेखिएको डायरीमा ‘भुटानी शरणार्थीको रकम खर्च भएको’ शीर्षकमा टोपबहादुर मामा, निरज राई र डा.इन्द्रजित राईलाई रकम दिएको हिसाव भेटिएको छ । जिल्ला अदालत काठमाडौंका न्यायाधीश प्रेमप्रसाद न्यौपानेको इजलासमा बयान गर्दा सानुले भने–‘त्यो डायरी मेरो होइन ।’