वनमाराले वन मासेकै हो?

कुनै वेला ‘पञ्चायती झार’ समेत भनिने आयातीत वनमाराबारेका केही कथन र अनुमान उल्टिँदै गएका छन्।

चार दशकभन्दा अघि डाँडाकाँडा पैदल चहार्दै गर्दा मैले वनमारा (ल्याटिन नाम ‘ऐडेनोफोरम् युफ्याटोरिएम्’) बारे मेसो पाएँ। विशेष गरी त्रिशूली नदीको किनारस्थित बेत्रावती गाउँदेखि उत्तरको एउटा पूरै इलाका वनमाराले ढाकेको देखेपछि लेख पनि लेखें। त्यो आयातीत बिरुवालाई ‘पञ्चायती झार’ पनि भनिन्थ्यो, जताततै वर्चस्व जमाएका कारण। कालो डाँठ र चुच्चो पात भएकाले यसलाई कालीमुन्टे पनि भनियो।