नेपाल बिजनेस समिट २०२६ सम्पन्न, व्यापारदेखि ऊर्जा र डिजिटल पूर्वाधारसम्म बहस

काठमाडौं । नेपाल बिजनेस समिट २०२६ काठमाडौंमा सफलतापूर्वक सम्पन्न भएको छ । नेपाल बिजनेस इन्स्टिच्युट (एनबीआई), नेपाल–भारत उद्योग वाणिज्य संघ (निक्की), कन्फेडेरेसन अफ बैंकिङ एन्ड फाइनान्सियल इन्स्टिच्युसन्स नेपाल (सिबिफिन) तथा फेडेरेसन अफ एक्सपोर्ट इन्टरप्रेन्योर्स नेपाल (फिन) को संयुक्त पहलमा आयोजित समिटमा नीति निर्माता, व्यवसायी, वित्तीय संस्था, उद्यमी तथा विकास साझेदारहरूको सहभागिता रहेको थियो ।

समिटका प्रमुख वक्ता तथा अर्थमन्त्री डा. स्वर्णिम वाग्लेले सरकारले आर्थिक नीति र शासन प्रणालीमा व्यापक सुधारका लागि स्पष्ट जनादेश प्राप्त गरेको उल्लेख गर्दै त्यसअनुसार सार्वजनिक तथा निजी क्षेत्रले प्रत्यक्ष अनुभूति गर्ने गरी काम भइरहेको बताए । उनले समान अवसरमा आधारित सामाजिक विकासलाई सरकारले प्राथमिकतामा राखेको र ऊर्जा तथा डिजिटल कनेक्टिभिटी नेपालको दिगो विकासका प्रमुख आधार रहेको धारणा व्यक्त गरे ।