२८ वर्षपछि विश्वकपमा फर्किएको स्कटल्यान्डको शानदार सुरुवात

काठमाडौं । फिफा विश्वकप-२०२६ मा २८ वर्ष लामो पर्खाइलाई अन्त्य गर्दै पुनरागमन गरेको स्कटल्यान्डले आफ्नो पहिलो खेलमै शानदार सुरुवात गरेको छ। अमेरिकाको बोस्टन स्टेडियममा आइतबार बिहान सम्पन्न खेलमा स्कटल्यान्डले हाइटीलाई १-० गोल अन्तरले पराजित गर्दै विश्वकपमा सुखद नतिजा निकालेको हो।

स्कटल्यान्डलाई यो महत्त्वपूर्ण जित दिलाउन जोन म्याकगिन नायक बने। खेलको २९औं मिनेटमा उनले गरेको उत्कृष्ट गोल नै टोलीको जितका लागि पर्याप्त र निर्णायक बन्न पुग्यो। मैदानमा हाइटीले स्कटल्यान्डको बराबरीमै बल पोसेसन (बल नियन्त्रण) राखेर कडा चुनौती दिए पनि बललाई जाली चुमाउन भने सकेन।

यो जित स्कटल्यान्डको फुटबल इतिहासमा निकै विशेष र ऐतिहासिक मानिएको छ। सन् १९९८ मा पछिल्लोपटक विश्वकप खेलेको यो राष्ट्र त्यसयता लगातार छनोट चरणबाटै बाहिरिँदै आएको थियो। झण्डै तीन दशकपछि विश्वकपको मञ्चमा फर्किएको स्कटल्यान्डले विश्वकपमा ३६ वर्षपछिको पहिलो जितको स्वादसमेत चाखेको छ। यसअघि उसले सन् १९९० को विश्वकपमा स्वीडेनलाई २-१ गोलले हराएको थियो।

यस सफलतासँगै स्कटल्यान्ड समूह ‘सी’ को शीर्ष स्थानमा उक्लिएको छ। आफ्नो खातामा महत्त्वपूर्ण ३ अंक जोडेको स्कटल्यान्ड तालिकाको पहिलो नम्बरमा रहँदा, सोही समूहको अर्को खेलमा बराबरी खेलेका मोरक्को र ब्राजिलले समान एक-एक अंक बाँडेका छन्। पहिलो खेलमै पराजय भोगेको हाइटी भने अङ्कविहीन अवस्थामा छ।

आइतबार नै सम्पन्न विश्वकपका अन्य खेलहरूमा पनि रोमाञ्चक बराबरी नतिजाहरू आएका छन्। कतार र स्विट्जरल्यान्डबीचको खेल १-१ गोलको बराबरीमा टुङ्गिएको छ भने मोरक्को र ब्राजिलले पनि १-१ गोलकै बराबरी खेल्दै अङ्क बाँडेका छन्।

आइतबारको खेलमा अस्ट्रेलिया र टर्की भिड्दै छन्। यो प्रतिस्पर्धा क्यानडाको भ्यानकुभर स्टेडियममा नेपाली समयअनुसार बिहान पौने १० बजेबाट सुरु हुनेछ। त्यसैगरी, आजको पाँचौं खेलमा बलियो टोली जर्मनीले कुराकाओको सामना गर्दैछ, जुन खेल राति पौने ११ बजे सुरु हुने तालिका रहेको छ।