रुकुम पूर्वमा कांग्रेसको चुनाव चिह्नमा एमालेको उम्मेदवार, स्वामित्व कसको ?

बुटवल । आसन्न स्थानीय तहको उपनिर्वाचनमा रुकुम पूर्वको पुथा उत्तरगंगा गाउँपालिकाको उपाध्यक्षमा उम्मेदवार बनेकी केश कुमारी तुलाचन कुन दलप्रति जिम्मेवार रहने भन्नेबारे प्रश्न उठेको छ । एमाले जिल्ला उपसचिव रहेकी तुलाचनले नेपाली कांग्रेसको चुनाव चिह्न लिएर उपनिर्वाचनमा उम्मेदवारी दिएकी छन् । उम्मेदवारी दर्ता गरेसँगै उनी घरदैलो गर्न थालिसकेकी छन् ।

तुलाचनले जितेको खण्डमा कांग्रेसको चुनाव चिह्न लिएका कारण उनी आधिकारिक रूपमा कांग्रेसकै जनप्रतिनिधि बन्नेछिन् । तर, योसँगै उनले एमालेको जिल्ला उपसचिवको भूमिका निर्वाह समेत गर्नेछिन् । एमाले रुकुम पूर्वका निवर्तमान जिल्ला अध्यक्ष टोपबहादुर वली यसलाई सामान्य रूपमा लिनुपर्ने बताउँछन् । तुलाचनले एमाले पार्टी छाडेर नभइ पार्टीकै निर्देशन अनुसार कांग्रेसको चुनाव चिह्न लिएर उम्मेदवारी दिएको प्रस्ट्याउँछन् ।