रास्वपा लम्बिनीको सभापतिमा शालिकराम घिमिरे निर्वाचित

बुटवल । राष्ट्रिय स्वतन्त्र पार्टीको लुम्बिनी प्रदेशका अध्यक्षमा रूपन्देहीका शालिकराम घिमिरे निर्वाचित भएका छन् । उनी निवर्तमान उपसभापति हुन् । दाङको घोराहीमा शनिबारदेखि जारी अधिवेशनमा सभापति पदका ६ जना प्रतिस्पर्धी थिए । पहिलो चरणको निर्वाचनमा शालिकराम घिमिरेले १ सय ९९ मत प्राप्त गरेका थिए ।

प्रतिस्पर्धामा दोस्रो हुने गोपाल घिमिरेले ८७ मत प्राप्त गरेका थिए । रास्वपाको विधानमा सभापति पदको उम्मेदवारले ५१ प्रतिशत मत प्राप्त गर्नु पर्ने व्यवस्था छ । पहिलो चरणमा प्रतिस्पर्धी मध्ये सबै भन्दा धेरै मत ल्याएका शालिकरामलाई दोस्रो मत प्राप्त गर्ने गोपालले समर्थन गरेपछि दोस्रो चरणको निर्वाचन नगरी शालिकरामलाई सभापति घोषणा गरिएको हो ।