एमालेमा आन्तरिक असन्तुष्टि बढ्दै

काठमाडौं । चुनाव नजिकिँदै जाँदा प्रमुख प्रतिपक्षी दल नेकपा एमाले सहितको गठबन्धनभित्र असन्तुष्टि बढेको छ । एमाले–जसपा–राप्रपासहित अन्य साना दलहरू गठबन्धन गरेर चुनाव जाने सहमतिअनुसार टिकटमा भागबण्डा गरेपछि पार्टीहरूमा आन्तरिक असमझदारी बढेको हो । गठबन्धनको ठूलो दल नेकपा एमालेका अध्यक्ष केपी शर्मा ओलीले पार्टीभित्र फरक मत राख्ने नेताहरूलाई टिकटबाट वञ्चित गरेको भन्दै कार्यकर्ता तहमा व्यापक असन्तुष्टि चुलिएको छ ।

एमालेबाट टिकट नपाएपछि नेता रामवीर मानन्धरले काठमाडौं क्षेत्र नम्बर ७ बाट स्वतन्त्र उम्मेदवारी मनोनयन दर्ता गराउनुभएको छ । टिकट नपाएपछि स्वतन्त्र उम्मेदवारी दिए पनि आफूले पार्टी नछाडेको दाबी गर्दै उहाँले भन्नुभयो, ‘मैले बनाएको पार्टी हो एमाले, म छाड्दिनँ ।’ उहाँले जनताले आफूलाई समर्थन गर्ने र पार्टीले उम्मेदवार बनाएका श्याम घिमिरेलाई छाड्न लगाउने संकेत गर्दै उहाँले भन्नुभयो– ‘पार्टीले टिकट दिएका उम्मेदवारले जनताको दबाबमा उम्मेदवारी फिर्ता लिने समय बाँकी छ ।’