रास्वपा उपसभापतिमा मन्त्री विराज भक्त श्रेष्ठको उम्मेदवारी घोषणा

चितवन । राष्ट्रिय स्वतन्त्र पार्टी (रास्वपा) का नेता एवं ऊर्जा, जलस्रोत तथा सिँचाइमन्त्री विराज भक्त श्रेष्ठले पार्टीको केन्द्रीय उपसभापति पदमा उम्मेदवारी दिने घोषणा गरेका छन् । चितवनमा जारी पार्टीको महाधिवेशन अन्तर्गत पहिलो चरणको निर्वाचनमा केन्द्रीय सदस्यमा निर्वाचित भएपछि उनले पदाधिकारीतर्फ आफ्नो दाबेदारी प्रस्तुत गरेका हुन् ।

केन्द्रीय सदस्यको निर्वाचनमा श्रेष्ठले २०९४ मत प्राप्त गरेका छन् । उम्मेदवारीको घोषणा गर्दै उनले सामाजिक सञ्जाल फेसबुकमा लेखेका छन्, ‘पहिलो चरणको उत्साहजनक नतिजाको लागि समस्त प्रतिनिधिहरुलाई हार्दिक धन्यवाद तथा नमन । दोस्रो चरणमा उपसभापति पदमा उम्मेदवारी दिने निर्णय गरेको छु, पुनः तपाईंहरुको माया र मतको अपेक्षा गरेको छु । जय होस् ।’