निर्वाचनमा कांग्रेसको कार्यभार

प्रतिनिधि तथा प्रदेश सभा सदस्यका लागि निर्वाचन तय गरिएको मङ्सिर ४ गते नजिकिँदै छ । सङ्घीय लोकतान्त्रिक गणतन्त्रात्मक शासन र बहुदलीय व्यवस्था भएको हाम्रो मुलुकमा आफूले रोजेको, खोजेको दल र जनप्रतिनिधि चुन्न मताधिकार प्रयोग गर्न पाउनु हरेक बालिग नागरिकको नैसर्गिक अधिकार हो । यसलाई सफल बनाउन सरकार र हरेक नागरिकको कर्तव्य हो ।

दशैँ, तिहार र छठको आगमनसँगै निर्वाचनको सरगर्मी पनि बढिरहेको छ । सत्तारूढ पाँचदलीय गठबन्धन कार्यदलले करिब दुई महिना बित्नै लाग्दा पनि सिट बाँडफाँटको टुङ्गो लगाउन सकेको छैन । कांग्रेसले सयको हाराहारीमा सिट लिनुपर्ने नेता तथा कार्यकर्ताको व्यापक दबाब छ । उता गठबन्धनमा रहेका दलका सम्मानजनक सिट नपाए गठबन्धनबाट अलग हुने घुर्कीले गर्दा सिट बाँडफाँट पेचिलो र चुनौतीपूर्ण छ । शीर्ष नेतृत्वले सुझबुझ र बुद्धिमत्तापूर्वक नेता–कार्यकर्ताको भविष्य हेरेर निर्णय लिन आवश्यक छ ।