बाला दुराको 'लमजुङे सोल्टिनी' बजारमा

टोकियो । जापानलाई कर्मथलो बनाउँदै आएकी लोकप्रिय गायिका बाला दुराले लोकलयमा आधारित दोहोरी गीत 'लमजुङे सोल्टिनी'को भिडियो बजारमा ल्याएकी छिन् । गायिका दुरालाई आवाजमा मौसम गुरुङले साथ दिएका छन् भने म्युजिक भिडियोमा गणेशमान घले, रजनी गुरुङ, मनोज गुरुङ र सिञ्जो दुराको अभिनय रहेको छ ।

वरिष्ठ सर्जक शिव हमालको गीत र मौसम गुरुङको संगीतमा तयार पारिएको लमजुङे सोल्टिनीमा तन्नेरी जोडीबीचको अगाढ माया र प्रेममा समर्पित भावलाई सुन्दर ढङ्गले लोकलयमा उतारिएको छ । उक्त म्युजिक भिडियो आफ्नै बाला दुरा युट्युब च्यानलमार्फत हालैमात्र सार्वजनिक गरेकी हुन् ।

राष्ट्रिय लोक तथा दोहोरीगीत प्रतिष्ठान जापान शाखाकी प्रवक्ता समेत रहेकी मीठो स्वरकी धनी गायिका दुरा लाइभ दोहोरीमा पनि उत्तिकै अब्बल मानिन्छन् । गीत र संगीतको उर्वर भूमि लमजुङको माटोमा जन्मिएकी गायिका दुराले आफ्नै लगानीमा निकालेकी लमजुङे सोल्टिनीलाई सुनेर, हेरेर र सब्स्क्राइभ गरेर साथ, सहयोग र हौसला प्रदान गर्नुका साथै सुझाव तथा प्रतिक्रिया दिई हौसला बढाइदिन अपिल गरेकी छिन् ।

घरदेशभन्दा सात समुद्रपारि परदेशमा रहँदै गर्दा बचेखुचेका समयमा नेपाली गीतसंगीत, कला, संस्कृति र नेपालीपनको साधना र संवर्द्धन गर्दा आफूलाई सन्तुष्टि मिल्ने गरेको गायिका दुराले बताइन् ।

गायिका दुराले आफ्नै आवाजमा सिर्जना यात्राको डेब्यू भने 'सुन्दरबजार सत्रसय फाँट'बाट गरेकी थिईन् भने त्यसपछि तीजका केही गीतहरु, सालैजो र मौलिक एकल तथा दोहोरी गरी करिब दर्जन जति एल्बममा उनले आवाज भरेकी छिन् ।