होल्डिङ सेन्टरबाट भूमिहीन हटाइएको घटनाप्रति राष्ट्रिय सभाका दुई समितिको आपत्ति

काठमाडौँ । राष्ट्रिय सभाअन्तर्गतका दुई संसदीय समितिले भूमिहीन नागरिकहरूलाई वैकल्पिक व्यवस्था विना नै अस्थायी रूपमा राखिएको ’होल्डिङ सेन्टर’ बाट हटाएर आश्रममा सारिएको घटनाप्रति गम्भीर आपत्ति जनाएका छन्।

बिहीबार सिंहदरबारमा बसेको ’सार्वजनिक नीति तथा प्रत्यायोजित विधायन समिति’ र ’सङ्घीयता सबलीकरण तथा राष्ट्रिय सरोकार समिति’ को संयुक्त बैठकमा उक्त होल्डिङ सेन्टरको अनुगमनपछिको समीक्षा गरिएको थियो। समीक्षाका क्रममा समितिका पदाधिकारीहरूले सरकारको यस कदमलाई ’अमानवीय’ भन्दै कडा आलोचना गरेका हुन्।