म्यानचेस्टर सिटी टोटेनहमसँग पराजित, ह्यारी केनको निर्णायक गोल

इङ्ग्लिस प्रिमियर लिग अन्तर्गत गएराति सम्पन्न खेलमा टोटेनहम हट्सपरले म्यानचेस्टर सिटीलाई हराएको छ। टोटेनहम हटस्पर स्टेडियममा सम्पन्न खेलमा घरेलु टोलीले सिटीमाथि १-० गोलको संघर्षपूर्ण जित निकालेको हो।

टोटेनहमको जितमा ह्यारी केनले कीर्तिमानी गोल गरे। उनले खेलको १५ औं मिनेटमा पिअरे इमाइल होएब्यको पासमा निर्णायक गोल गरे। योसँगै उनी टोटेनहमका लागि सर्वाकालीन सर्वाधिक गोलगर्ने खेलाडी बनेका छन्। टोटेनहमबाट यो उनको २६७ औं र प्रिमियर लिगमा २०० औं गोल हो। यसक्रममा उनले जिम्मी ग्रिएभ्सको कीर्तिमानलाई पछि पारे। प्रिमियर लिगको पनि सर्वकालीन सर्वाधिक गोलकर्ताको सूचिमा केन तेस्रो स्थानमा छन्। यो सूचिमा एलेन सिअरर २६० गोलसहित शीर्ष स्थानमा रहँदा दोस्रो स्थानमा २०८ गोल गरेका वायने रुनी छन्।