स्वतन्त्रताको सङ्गीत

कडा नियमहरूमा नबाँधिने र सरल शैलीमा बग्ने लोक–पप विधाले नेपाली सङ्गीतमा स्वतन्त्र स्थानको खोजी गरेको छ।

सामान्यतया विश्वभर नै, ‘पपुलर’ छोटकरीमा पप सङ्गीतले विभिन्न विधाबाट सापटी लिएर धेरै कुराको सम्मिश्रण गरी आम मानिसलाई मन पर्ने किसिमको नयाँ सामग्री बनाउँछ। सङ्गीतका अरू विधाभन्दा यो छोटो र छरितो हुन्छ, र यसको शब्द तथा सङ्गीत बुझ्न र दोहोर्‍याउन सजिलो हुन्छ। यस्तो सङ्गीत ‘कलाका रूपमा भन्दा पनि उद्यमका रूपमा बनाइने’ र ‘यसले कुनै विशेष ठाउँ वा सङ्गीतको प्रभावलाई नजनाउने’ सङ्गीतका अध्येता साइमन फ्रिथले आफ्नो पुस्तक वर्ल्ड म्यूजिक, पोलिटिक्स एन्ड सोसल चेन्जमा लेखेका छन्।