नेपालका पर्यटनकर्मीलाई चिनियाँ भाषा प्रशिक्षण सुरु

काठमाडौँ । नेपालका पर्यटन पेसाकर्मीहरूका लागि चिनियाँ भाषा प्रशिक्षण सुरु भएको छ । नेपाल पर्यटन बोर्ड र नेपालस्थित चिनियाँ दूतावासको संयुक्त आयोजनामा बोर्डको सभा हलमा शुक्रबार संस्कृति, पर्यटन तथा नागरिक उड्डयन मन्त्री बद्री प्रसाद पाण्डेले चिनियाँ भाषा प्रशिक्षणको सातौँ ब्याचको औपचारिक उद्घाटन गरेका हुन् ।

नेपालका पर्यटन पेसाकर्मी तथा व्यवसायीहरूलाई लक्षित गर्दै सुरु गरिएको भाषा प्रशिक्षण कार्यक्रमको उद्घाटन गर्दै मन्त्री पाण्डेले चिनियाँ भाषाको प्रशिक्षण कार्यक्रमले नेपालको पर्यटन प्रवर्द्धनमा टेवा पुग्ने विश्वास व्यक्त गरेका छन् । उनले भने, ‘चिनियाँ भाषाको ज्ञानले नेपाल–चीन सम्बन्धमा सेतुको काम गर्नेछ र यसले पर्यटन प्रवर्द्धनमा टेवा पुग्ने विश्वास लिएको छु ।’