आर्थिक लाभ लिने मोह, नेपाली विद्यार्थी युक्रेनी सेनाको कब्जामा

काठमाडौँ । विद्यार्थी भिसामा रुस पुगेका दाङ तुलसीपुर उपमहानगरपालिका-१९ बिजौरीका प्रतीक पुनलाई रुसी सेना बनेर मनग्य आर्थिक लाभ लिने मोह जाग्यो । दुई महिना मस्कोमा बिताएका प्रतीकलाई मनग्य कमाइ हुने लोभसँगै रुसको नागरिक बन्ने मोहले रुसी सेना बन्ने बाटोमा पुग्यो । अन्ततः युक्रेन - रुसबिचको युद्धमा सहभागी उनी युक्रेनी सेनाको कब्जामा परेका छन् ।

युक्रेनी सेनाको कब्जामा रहेकै बेला प्रतीकले बोलेको एउटा भिडियो सार्वजनिक भएको छ । उनले भिडियोमार्फत आफू रुसी सेनामा भर्ती भएको र अहिले युक्रेनले आफूलाई कब्जामा लिएको बताएका छन् । 'मेरो नाम प्रतीक पुन हो । मेरो घर नेपाल दाङ बिजौरीमा हो,' भिडियोमा उनले भनेका छन्, 'म रुसी सेनामा भर्ना भएको थिएँ । अहिले युक्रेनको कब्जामा छु ।'